Литовская Метрика, 1561г., книга 564, книга публичных дел 7
Небезинтересная запись накануне Ливонской войны. И интерсное упоминание о разведке. Слово разведчик, видимо, изобрели позднее, поначалу были "шпики".
51. 1561.09.20 Властныя понесь листы до старость и де/вкавецъ украинъныхъ писаные, абы у в осторожности были: до старосты гомеиского, до старосты мстиславъского, до державъцы острского, до дер(жавцы) кричовского, до державцы речицкого, до дер(жавцы) любечъского, до дер(жавцы) чечерского и пропоиского.
Тыминьскии понесъ: до пана воев(оды) полоцкого, до кн(я)з(я) воев(оды) витебъского, до дер(жавцы) оршаньского. Тые листы такъ писаны: Ижъ тыхъ часовъ за помочъю Божъею замокъ Таврусъ в земли Ифълянтскои, котории былъ неприятел наш княз великий московъскии несправедливе посел, через войско нашо есть добыт, к тому тежъ и выштъю перемиря паньству нашему зъ землею Московъскою часъ недалекий, прото обавяючи ся, абы тот неприятель подступъное хитрости и звыклого хвортелю своего над паньством нашим не вжилъ, приказуемъ тобе, ажъбы еси на тых замъках нашихъ, врадех своихъ, в доброй опатрности и осторожности мешъкалъ и бояромъ чичерскимъ и пропоискимъ, и подданымъ нашимъ такежъ у в осторожности быти казалъ, и зъ маетьностями ихъ вжо за часу до замъков упроваживати ся и живностями вшелякими для часу небезпечъного от неприятеля в замокъ тамошънии спижовати ся имъ велелъ. А особливе приказуемъ тобе, ажъбы еси через шпекговъ своихъ о вмысле того неприятеля нашого выведывалъ ся, и чого ся зъ стороны его доведаешъ, о том бы еси без кажъдого мешъканья намъ ведати давалъ. П(и)сан у Вильни, лет(а) Бож(его) на-рожъ(енья) 1561, м(е)с(е)ца сенътебра 20 дня. 76(59)
